Góði veljari

Eg bjóði meg fram sum valevni fyri javnaðarflokkin til hetta løgtingsval. Eg ætli mær at leggja alla orku í at arbeiða fyri einum sterkum búskapi, sum kann vera støðið undir einum tryggum vælferðarpolitikki. Vit eiga altíð at meta dygdina í samfelagnum eftir umstøðunum hjá teimum veikastu.

Tí eitt samfelag, har tey veiku hava tað gott, er eitt gott samfelag.

Javnaðarflokkurin fer til val upp á eina nýggja jarðbundna og solidariska skattaskipan, ið viðurkennir, at vælferðin skal fíggjast av okkum øllum í felag. Ein skattaskipan, sum er bæði lættari og rættari. Vit hava fingið nóg mikið av teimum skatta- og búskaparskipanum, sum hava rent flestu búskapir í heiminum um koll, og sum tað framvegis eru flokkar í Føroyum, sum trúgva upp á.

Vit skulu skapa vøkstur, nýggj arbeiðspláss, samhaldsfesti og trivnað. Vit hava eina sterka mentan, sum vit skulu tora at líta á. Og vit skulu altíð stremba eftir einum sjálvberandi búskapi.

Tí eitt samfelag, sum strembar eftir sjálvbjargni , er eitt sterkt samfelag.

Á hesari heimasíðu greiði eg frá ymsum málum, sum vit hava avrikað í farna valskeiði , og frá málum sum eg fari at virka fyri í komandi valskeiði.

Eg vil ógvuliga fegin hoyra tíni sjónarmið og svara tínum spurningum. Um tú fert inn á “Spyr Helenu” og skrivar ein spurning ella eitt sjónarmið, so skal eg gera mítt besta at svara.

Blíðar heilsanir,

Helena Dam á Neystabø